गुल्मी । गुल्मीका चिकित्सक तथा स्वास्थ्यकर्मीहरुलाई पेट, आन्द्रा, कलेजो तथा प्याङक्रियाज रोग सम्बन्धि अभिमुखिकरण गरिएको छ । ग्याष्ट्रो सेन्टर बुटवल प्रालिको आयोजना तथा शुभलक्ष्मी फर्माको समन्वयमा अभिमुखिकरण गरिएको हो ।
पेट, आन्द्रा, कलेजो तथा प्याङक्रियाज रोग बिशेषज्ञ डाक्टर मोहन भुसालले गुल्मी अस्पताल र विभिन्न पालिकाका चिकित्सक तथा स्वास्थ्यकर्मीहरुलाई पेटमा ग्याष्ट्राइटिस, अल्सर र क्यान्सर गराउने किटाणुको पहिचान, उपचार र नियन्त्रणको बारेमा अभिमुखिकरण गरेका थिए । गुल्मी अस्पताल तम्घासको निमित्त प्रमुख डाक्टर सोफिया थापाको प्रमुख आतिथ्यता रहेको कार्यक्रममा चिकित्सक तथा स्वास्थ्यकर्मीहरुले अभिमुखिकरण समय सान्दर्भिक र फलदायी भएको प्रतिक्रिया दिएका थिए ।
डाक्टर भुसाल मार्फत शुभलक्ष्मी फर्मा तम्घासले पेट, आन्द्रा, कलेजो तथा प्याङक्रियाज रोगको विशेषज्ञ सेवा सुरु गरेको छ । दिर्घ अल्सर तथा पेटका रोगीको पहिचान, त्यस्ता बिरामीको क्यान्सर र अन्य रोगको पहिचानका लागि इण्डोस्कोपीक बायस्पी सहितको सेवा दिन थालिएको शुभ लक्ष्मी फर्मामा प्रोपाइटर होम बहादुर थापा पल्लीले जानकारी दिए । डाक्टर भुसाल त्रिवि शिक्षण अस्पताल महाराजगञ्ज काठमाण्डौमा लामो समय अनुभव प्राप्त र अहिले लुम्बिनी प्रादेशिक अस्पताल तथा ग्याष्ट्रो सेन्टर बुटवल प्रालिमा कार्यरत छन् । महिनामा एक पटक भएपनि जिल्लामा बोलाएर नागरिकलाई बिशेषज्ञ सेवा प्रदान गर्न थालिएको प्रोपाइटर पल्लीले बताए । उनले सोहि रोगको पहिचान र उपचारको लागि हजारौ रुपैयाँ खर्च गरेर जिल्ला बाहिर जानुपर्ने गुल्मेलीलाई महिनामा एक पटक भएपनि इण्डोस्कोपीकसहितको पेट, आन्द्रा, कलेजो तथा प्याङक्रियाज रोगको परिक्षण र उपचार सेवा प्रदान गर्न खोजिएको बताए । ‘पैसा र सम्पतिभन्दा स्वास्थ्य सवैभन्दा ठुलो कुरा हो । मौकामा बिशेषज्ञसहितको उपचार गर्दा जोखिम कम हुन्छ,’उनले भने,‘भुसाल डाक्टर साप जिल्लामा पाउनु ठुलो सौभाग्य हो ।’ पेट, आन्द्रा, कलेजो तथा प्याङक्रियाज रोग बिशेषज्ञ डाक्टर मोहन भुसालका अनुसार पेटका सबै दुखाइ ग्याष्ट्राइटिस होइनन् ।
ग्याष्ट्रीकजन्य किटाणुका कारण हुने ग्याष्ट्राइटिसको बेलैमा पहिचान र उपचार आवश्यक भएकाले अपडेट भएका बिषयमा चिकित्सक तथा स्वास्थकर्मीलाई अभिमुखिकरण गरिएको डाक्टर भुसालले बताए ।
ग्याष्ट्राइटिस हुँदा पेट ढुस्स हुने, अमिलो पानी आउने, डकार आउने, खाना खाने बित्तिकै पेट भरिए जस्तो महसुस हुने, वाक वक लाग्ने जस्ता लक्षण देखिन्छन्।
