बिमल सुनार, गुल्मी । मालिका गाउँपालिका वडा नम्बर ५ छापहिलेमा तीज पर्वलाई लक्षित गरी नाचगान तथा दर खाने कार्यक्रम भव्य रूपमा सम्पन्न भएको छ । वडा कार्यालयको आयोजना र स्थानीय समुदायको सहकार्यमा भएको कार्यक्रममा विभिन्न टोल-छिमेकका महिलाहरुको उत्साहपूर्ण सहभागिता रहेको थियो ।
भाद्र ४ गते सम्पन्न सो कार्यक्रममा छापहिलेका महिलाहरुलाई समूहगत रूपमा नाचगानमा प्रस्तुत हुन आमन्त्रण गरिएको थियो । पारम्परिक भाकासहित प्रस्तुत गरिएका नृत्यहरुले वातावरणलाई झन् रमाइलो बनाएको सहभागीहरुले बताएका छन् ।
कार्यक्रममा वडा नं. ५ का अध्यक्ष रेखा कुमार जिसी, वडा नं. ७ का अध्यक्ष हिरा बहादुर कार्की, वडाभित्रका विद्यालयका शिक्षक-विद्यार्थी, स्थानीय स्वास्थ्य संस्थाका स्वास्थ्यकर्मी लगायत विभिन्न क्षेत्रका व्यक्तिहरुको उपस्थिति थियो ।
वडाअध्यक्ष जिसीले तीजको अवसरमा आयोजना गरिएको यस किसिमको कार्यक्रमले सांस्कृतिक सम्पदा संरक्षण र समुदायबीच आपसी भेटघाट तथा सद्भाव वृद्धि हुने बताउनुभयो । उहाँले हरेक वर्ष निरन्तर रुपमा दर खाने चलनसँगै सांस्कृतिक कार्यक्रम आयोजना गर्दै आएको पनि स्मरण गर्नुभयो ।
कार्यक्रममा नृत्य प्रस्तुत गर्ने समूहहरुलाई पुरस्कार प्रदान गरिएको थियो । यसले सहभागी महिलाहरुमा अझ उत्साह जगाएको थियो ।
कार्यक्रमसँग सम्बन्धित तस्बिरहरू :
