गुल्मी । गुल्मीमा निजी तथा आवसीय विद्यालय अर्गनाइजेसन नेपाल (प्याब्सन) ले सरोकारवालाहरूसँग अन्तरक्रिया गरेको छ । पछिल्लो प्रस्तावित शिक्षा ऐन-२०८० विभेदकारी भएको भन्दै जिल्लास्थित राजनीतिक दल र संघसंस्थाका प्रमुख तथा प्रतिनिधिहरूलाई जानकारी गराउने उद्देश्यले प्याब्सनले अन्तरक्रिया गरेको हो ।
निजी विद्यालय गुणस्तरीय शिक्षा प्रदान गर्ने नाफामूलक संस्था नै भएको प्याब्सन गुल्मीका अध्यक्ष राजु कुँवरले दाबी गरे । उनले निजी विद्यालय सेवामूलक नहुने बताए । ‘सरकार केही नहुनेको हो तर त्यसतर्फ ध्यान दिँदैन,’ उनले भने, ‘निजी विद्यालयको बिषयमा सरकारले अनावश्यक टाउको दुखाएको छ ।’ निजी विद्यालयले नेपालको शिक्षामा योगदान गरेको उनले बताए । जेहेन्दार र गरिब विद्यार्थीलाई छात्रवृत्ति दिलाएर सहयोग गरेको पनि उनले बताए । ‘विद्यालय स्थापना गर्न ऋण लिएर लगानी गरिएको हुन्छ,’ उनले भने, ‘नाफामूलक नभए कसरी चल्छ ? हामी अभिभावक बन्ने हो बाबाआमा बन्ने होइन, पूर्ण छात्रवृत्तिको सम्भावना नै छैन् ।’
प्याब्सन गुल्मीका अध्यक्ष कुँवरले निजी विद्यालय संचालकको धारणा प्रस्तुत गरे । उनले विभेदकारी शिक्षा ऐन खारेज हुनुपर्ने माग आफूहरूको रहेको बताए ।
नागरिक समाज गुल्मीका अध्यक्ष पदमप्रसाद पाण्डेले निजी विद्यालयको माग र गुनासोमा सहमती भएको बताए । राज्यले शिक्षा र स्वास्थ्यको पूर्ण दायित्व लिनुपर्नेमा यसलाई अझ विवादमा ल्याउनु गलत भएको बताए ।
गुल्मी चेम्बर अफ कमर्शका अध्यक्ष दुर्गा पाण्डेले निजी क्षेत्र बिना कुनै विकास सम्भावना नहुने बताए । उनले निजी क्षेत्रलाई सहयोग नगरे त जिम्मा लिनुपर्ने बताए ।
उद्योग वाणिज्य संघ गुल्मीका अध्यक्ष मृगेन्द्र प्रसाद श्रेष्ठले निजी विद्यालयमा रहेको जोश र जाँगरलाई कमजोर बनाउन नहुने बताए । उनले विवादित प्रावधान हटाउनुपर्ने धारण व्यक्त गरे ।
प्याब्सन गुल्मीका पूर्वअध्यक्ष दानबहादुर केसीले नाफामूलक भनेर कम्पनी ऐनमा दर्ता गराएर कर लिने अनि अहिले आएर गैरनाफामूलक भन्ने कदापि हुन नसक्ने बताए । ‘देशले शिक्षा गलत गर्ने खत्तम खेलमा लागेको छ,’ उनले भने, ‘संविधानमा समाजवाद लेखेको कारण निजीकरणमा जान हुँदैन् भन्ने अलमलमा सरकार छ ।’ सरकारकाले समाजवाद भन्ने शब्दको अर्थ समेत नबुझेको र बिश्लेषण समेत गर्न नसकेको उनको आरोप छ ।
नेकपा माओवादी केन्द्रका नेता वीरबहादुर कार्कीले वर्तमान सरकारबाट न्याय पाउने आश गर्नु नै बिडम्बना भएको बताए । उनले आˆना माग पूरा गर्न आन्दोलन नै गर्नुपर्ने बताए ।
नेकपा एमालेका नेता माधव ज्ञवालीले शिक्षा र स्वास्थ्य राष्ट्रियकरण हुनुपर्ने बताए । आन्दोलनबाट सम्झौता गर्ने तर कार्यान्वयन नगरेको भन्दै उनले आन्दोलनरत पक्ष र सरकारले वार्ता गरेर कार्यान्वयन गर्नुपर्ने बताए ।
नेपाली काँग्रेस गुल्मीका सभापति खिलध्वज पन्थीले निजी विद्यालयलाई नीतिगत रुपमा परेको नकारात्मक असरप्रति गम्भीर रहेको बताए । ‘एउटा कानुन बन्न थुप्रै वर्ष लाग्ने समस्या छ,’ उनले भने, ‘विधेयक पारित हुनुपर्छ तर निजी क्षेत्रलाई प्रोत्साहितको सट्टा निरुत्साहित बनाउन हुँदैन् ।’ उनले प्याब्सनका माग पूरा हुन आवश्यक रहेको बताए ।
प्याब्सन गुल्मीले सरोकारवालारूसँग अन्तरक्रियापछि जिल्ला प्रशासन कार्यालय गुल्मी परिसरमा कोणसभा गरेको थियो । साथै शुक्रबारदेखि सबै विद्यालय बन्द गरेर सडक आन्दोलन सुरु हुनेछ ।
गुल्मीमा ४२ वटा निजी विद्यालय छन् । उक्त विद्यालयमा रहेका १२ हजार विद्यार्थीलाई १ हजार २ सय शिक्षकले अध्यापन गराउँदै आएका छन् ।
