गुल्मी । निर्माण व्यवसायी संघ जिल्ला कार्यसमिति गुल्मीले बजेट सुनिश्चित नगरी योजनाहरुमा ठेक्का लगाउँदा धेरै योजना अलपत्र परेको भन्दै सरकारलाई दोष लगाएको छ।
मंगलबार नवनिर्वाचित कार्यसमितिको प्रमाणपत्र ग्रहण तथा पदभार ग्रहण कार्यक्रममा अध्यक्ष हरि कुमार श्रेष्ठले स्थानीय तहमा ९० प्रतिशत बजेट सुनिश्चित भएका योजनाहरु समयमै सम्पन्न भएको तर बहुवर्षीय योजनाका नाममा ठेक्का खोलेर पैसा नदिँदा काम अलपत्र परेको र दाेष चाहिँ निर्माण व्यावसायिलाई लगाउने र भ्रम फैलिएको बताए।
श्रेष्ठले भने, “जिल्लाभित्रका व्यवसायीले काम समयमा सम्पन्न गरेका छन्, तर बाहिरका व्यवसायीले ठेक्का लिएर योजनाहरु अलपत्र पार्ने र दोष जिल्लाका व्यवसायीले खेप्नु परेको छ।”
कार्यक्रमका प्रमुख अतिथि रेसुङ्गा नगरपालिका मेयर खिलध्वज पन्थीले निर्माण व्यवसायीलाई गुणस्तरीय काम समयमै सम्पन्न गर्न आग्रह गर्दै भने कि काम सम्पन्न भएपनि भुक्तानी नपाउने समस्या दुःखद छ।
निर्माण व्यवसायी संघले बजेट सुनिश्चित भएका योजनाहरु अलपत्र पार्ने व्यवसायीविरुद्ध आवश्यक कारवाही हुनुपर्ने चेतावनीसमेत दिएको छ।
