गुल्मी । निर्माण व्यवसायीहरूको साझा छाता संस्था निर्माण व्यवसायी संघ गुल्मीको अध्यक्षमा हरिकुमार श्रेष्ठ सर्वसम्मत निर्वाचित हुनुभएको छ। शनिबार सदरमुकाम तम्घासमा सम्पन्न संघको नवौं अधिवेशनले आगामी पाँच वर्षका लागि श्रेष्ठसहितको नयाँ कार्यसमिति चयन गरेको हो।
अधिवेशनमा जिल्लाका विभिन्न क्षेत्रका निर्माण व्यवसायीहरूको सहभागिता थियो। यसपटक कुनै पनि पदमा प्रतिस्पर्धा नभएकाले सबै पदाधिकारीहरू सर्वसम्मत निर्वाचित भएका छन्। यसलाई संघभित्रको एकता र सहकार्यको महत्वपूर्ण उपलब्धि मानिएको छ।
अधिवेशनबाट अध्यक्षमा हरिकुमार श्रेष्ठ, वरिष्ठ उपाध्यक्षमा गगन केसी, उपाध्यक्षमा दधिराम पाण्डे, महासचिवमा भागवत गिरी, उप–महासचिवमा भोजप्रसाद श्रेष्ठ, सचिवमा कृष्णप्रसाद भण्डारी, कोषाध्यक्षमा दुर्गाचन्द्र बोहोरा र सह–कोषाध्यक्षमा नवराज श्रेष्ठ निर्वाचित हुनुभएको छ।
त्यस्तै सदस्यतर्फ जमुना न्यौपाने, चुराबहादुर खत्री क्षेत्री, पदम विष्ट, ओमबहादुर केसी, वीरेन्द्र भुसाल, चेहरसिंह टण्डन, राजु कार्की, विजय पन्थी र मधु महर्जन निर्वाचित भएका छन्।
पदभार ग्रहणपछि अध्यक्ष श्रेष्ठले आगामी दिनमा निर्माण व्यवसायीहरूको हक–अधिकार संरक्षण, समस्या समाधान र व्यवसायको मर्यादा प्रवर्द्धनका लागि कुनै कमी नगर्ने प्रतिबद्धता व्यक्त गर्नुभयो। संघलाई अझ मजबुत, गतिशील र समावेशी बनाएर अघि बढ्ने प्रतिज्ञा समेत गर्नुभयो।
उहाँले पारदर्शिता, उत्तरदायित्व र सामूहिकतामा आधारित भएर काम गर्ने बताउँदै निर्माण व्यवसायीहरूको प्रतिष्ठा कायम राख्नुपर्नेमा जोड दिनुभयो। साथै, स्थानीय, प्रदेश र संघीय तहमा सरकारी निकायहरूसँग सहकार्य गर्दै निर्माण व्यवसायीहरूको आवाज बुलन्द गर्ने योजनासमेत प्रस्तुत गर्नुभयो।
स्थापना देखिनै निर्माण व्यवसायी संघ गुल्मीले जिल्लाभित्रका व्यवसायीहरूलाई साझा संगठनमार्फत संगठित गर्दै आएको छ। यसले व्यवसायीबीच समन्वय, दक्षता अभिवृद्धि, समस्या समाधान र अधिकार संरक्षणमा महत्वपूर्ण योगदान दिँदै आएको छ।
अधिवेशनले संघलाई अझ प्रगतिशील ढंगले अघि बढाउन मार्ग प्रशस्त गरेको भन्दै अध्यक्ष श्रेष्ठले सबै व्यवसायीबीचको एकता, विश्वास र सहकार्यलाई अधिवेशनले थप मजबुत पारेको बताउनुभयो।
