गुल्मी । जुम्लाको प्रसिद्ध जुम्ली स्याउ अहिले गुल्मीको तम्घास बजारमा आइपुगेको छ।
जुम्लाका स्थानीय लक्ष्मीकान्त आचार्य, जगतबहादुर शाही, मनिशचन्द्र आचार्य र बिष्णुरुद्र आचार्य स्याउ बिक्रीका लागि गुल्मी सदरमुकाम तम्घास आएका हुन्। जुम्लामा सस्तोमा खरिद गरिएको स्याउ नेपालगञ्ज हुँदै बुटवलमार्ग भएर तम्घास ल्याउँदा ढुवानी खर्च धेरै पर्ने भएकाले प्रतिकिलो रु. २०० देखि २५० सम्ममा बिक्री भइरहेको छ।
यस वर्ष पहिलो चरणमा ५० क्विन्टल स्याउ बिक्रीका लागि ल्याइएको लक्ष्मीकान्त आचार्यले जानकारी दिए। विगत तीन वर्षदेखि गुल्मीमा दाल, कपडा तथा अन्य सामग्री बिक्री गर्दै आएका उनीहरूले यसपटक जुम्ली स्याउ ल्याएर बिक्री सुरु गरेका हुन्।
स्याउ ल्याउँदा ढुवानी खर्च बढी परेपनि जुम्लाको उत्पादन गुल्मीमा ल्याएर बिक्री गर्न पाउँदा आत्मसन्तुष्टि मिल्ने लक्ष्मीकान्तले बताए।
हाल जुम्ली स्याउको माग गुल्मी सहित अन्य पहाडी जिल्लामा क्रमशः बढ्दै गएको छ। जसका कारण उत्पादकहरूले पनि उचित मूल्य पाउन थालेका छन्।
जुम्लाबाट ल्याइएका उनीहरू हाल तम्घास बसपार्क माथि भगवती मन्दिर नजिकै स्याउ बिक्रीका लागि बसेका छन्।
