गुल्मी । नेपाल कम्युनिष्ट पार्टी (एमाले) जिल्ला कमिटी गुल्मीको पदाधिकारी बैठकले मुसिकोट नगरपालिका उपप्रमुख गंगा श्रेष्ठलाई १ वर्षका लागि पार्टी सदस्यता निलम्बन गर्ने निर्णय गरेको छ।
एमाले जिल्ला कमिटीका अध्यक्ष बालसिंह काउछाद्वारा हस्ताक्षरित पत्रअनुसार श्रेष्ठलाई २०८२ असार २९ गते स्पष्टीकरण सोधिएको थियो। उनले असार ३२ गते आफ्नो लिखित जवाफ पेश गरेकी थिइन्।
यसअघि नेकपा एमाले मुसिकोट नगर कमिटीको बैठकले श्रेष्ठलाई सचेत गराउने निर्णय गर्दै कार्यदल गठन गरी सुधारको प्रयास गरेको थियो। तर, श्रेष्ठले सो प्रयासलाई गम्भीरतापूर्वक नलिएको र सुधार नगरेको भन्दै नगर कमिटीले जिल्ला कमिटीमा कारबाहीका लागि सिफारिस गरेको थियो।
सिफारिसको अध्ययनपछि जिल्ला कमिटीको २०८२ साउन १९ गतेको बैठकले तत्काल लागू हुनेगरी १ वर्षका लागि पार्टी सदस्यता निलम्बन गर्ने निर्णय गरेको हो। निलम्बन अवधिमा श्रेष्ठलाई पार्टी सदस्यको हैसियतमा कुनै पनि कार्य वा निर्णयमा संलग्न हुन वा गराउन नपाउने निर्देशन दिइएको छ।
श्रेष्ठ २०७९ सालको स्थानीय तह निर्वाचनमा उपप्रमुख निर्वाचित भएकी हुन्। हालै उनले मुसिकोट नगरपालिकाको बजेट निर्माण प्रक्रियामा असहमति जनाउँदै सार्वजनिक रूपमा टिप्पणी गरेकी थिइन्। उनी एमाले जिल्ला कमिटी सदस्य पनि हुन् ।
