- नगरमै ११ र १२ पढे थप ५० हजार छात्रवृत्ति
गुल्मी । गुल्मीको रेसुङ्गा नगरपालिकाले माध्यमिक शिक्षा परीक्षा (एसईई) मा उत्कृष्ट नतिजा ल्याउने विद्यार्थीलाई नगद पुरस्कार दिने घोषणा गरेको छ।
नगर प्रमुख खिलध्वज पन्थीले १७औँ नगरसभामा सार्वजनिक गरेको आगामी आर्थिक वर्ष २०८२/८३ को नीति तथा कार्यक्रममार्फत “नगर प्रमुख शैक्षिक पुरस्कार” सुरु गरिने जानकारी गराउनुभयो।
यस अनुसार, नगरभित्रका विद्यालयमा अध्ययन गरेर एसईईमा ग्रेड पोइन्ट औसत (जीपीए) ४.० प्राप्त गर्ने विद्यार्थीलाई नगद १ लाख रुपैयाँ पुरस्कार दिइनेछ।
त्यति मात्र होइन, उक्त पुरस्कार प्राप्त गर्ने विद्यार्थीले नगरपालिकाभित्रकै सामुदायिक विद्यालयमा कक्षा ११ र १२ अध्ययन गरेमा, कक्षा १२ उत्तीर्ण भएपछि थप ५० हजार रुपैयाँ छात्रवृत्तिको रूपमा एकमुष्ठ प्राप्त गर्ने व्यवस्था पनि गरिएको छ।
नगरपालिकाका अनुसार यो योजनाले विद्यार्थीहरूलाई उत्कृष्टता हासिल गर्न प्रेरणा दिनेछ भने सामुदायिक विद्यालयहरूमा गुणस्तरीय शिक्षाको प्रवर्द्धनमा पनि टेवा पुग्नेछ।
नगर प्रमुख पन्थीले योजना मेहनती र लक्ष्यमा केन्द्रित विद्यार्थीहरूका लागि थप ऊर्जा र उत्प्रेरणाको स्रोत बन्ने विश्वास व्यक्त गर्नुभयो ।
