गुल्मी । ताराखसे युवा क्लब मुसिकोट नगरपालिका वडा नम्बर ८ मालारानीले खुल्ला वडा स्तरीय महिला तथा पुरुष भलिबल एवम् सांस्कृतिक कार्यक्रम आयोजना गरेको छ । यही चैत्र २६ देखी २९ सम्म विविध खेलकुद तथा साँस्कृतिक कार्यक्रमको आयोजना गरेको क्लबका सचिब नविन घरब्जा छन्तेलले जानकारी दिए ।
पुरुष भलिबल प्रतियोगिता तर्फ प्रथम पुरस्कार ७५ हजार कप मेडल र प्रमाणपत्र, द्धितिय कप मेडल र प्रमाणपत्र, ५० हजार कप, मेडल र प्रमाणपत्र, तृतिय पुरस्कार ३० हजार कप, मेडल र प्रमाणपत्र रहेको छ । महिला भलिबल प्रतियोगिता तर्फ प्रथम पुरस्कार ३० हजार कप मेडल र प्रमाणपत्र, द्धितिय पुरस्कार २० हजार कप मेडल र प्रमाणपत्र र १० हजार कप मेडल र प्रमाणपत्र रहेको छ भने प्रत्येक विद्यामा आर्कषक पुरस्कार रहेको आयोजकले जनाएको छ ।
खुल्ल्ला पुरुष भलिबल प्रतियोगिता, खुल्ला महिला भलिबल प्रतियोगिता, भेटरन्स भलिबल र सांस्कृतिक झाँकी रहेको क्लबका सचिब छन्तेलले जानकारी दिए । क्लबले खेलकुद क्षेत्रमा राष्ट्रिय खेलाडी उत्पादन गर्ने उदेश्यले बार्षिकोत्सवको अवसरमा खेलकुद कार्यक्रम राख्दै आएको छ । साथै मालारानीमा रहेको ऐतिहासिक पर्यटकीय क्षेत्र सालिमे दह र ताराखसेको प्रचारप्रसार र लोप उन्मुख हुन लागेको घाटु नाचको संरक्षण गर्ने उदेश्यले कार्यक्रम गरिएको सचिब छन्तेलले बताउनुभयो । ताराखसे युवा क्लबको १३ औँ बार्षिकोत्सवमा मालारानी सेवा समाज जापान मुख्य प्रायोजक रहेको छ । मालारानी सेवा समाज जापानले पुरुष भलिबल तर्फको प्रथम र तृतीय पुरस्कार गरि नगद एक लाख पचास हजार सहयोग गरेको छ ।
आफ्नो गाउँमा क्लबले गरेको कार्यक्रममा मुख्य प्रायोजकको रुपमा सहयोग गर्न पाउँदा खुशी लागेको समाजका अध्यक्ष चेतबहादुर खत्रीले बताउनुभयो । यस संस्थाको उदेश्य रोजगारीको लागि जापानमा रहनुभएको मालारानी बाँसीहरुलाई एकीकृत गरि संस्थागत रुपमा अघि बढ्ने योजना अनुरुप समाज गठन गरिएको समाजका कोषाध्यक्ष खिन घर्तीले बताउनुभयो । संस्थाले हरेक बर्ष क्लबको कार्यक्रममा सहयोग गर्दै आईरहेको र निरन्तर एउटा क्लबको संरक्षक रुपमा सहयोग गर्ने प्रतिबद्धता जनाएको छ । विगतमा पनि दिन दुखी, बिरामी, प्राकृतिक प्रकोप जस्ता भईपरी आउने विपद्धमा मानविय सेवा गर्दै आईरहेको समाजका सचिव श्याम छन्तेलले बताउनुभयो ।
