गुल्मी । हिन्दू नारीहरूको महान चाड तीज नजिकिँदै गर्दा नेपाली सांगीतिक बजारमा तीज गीतहरूको रौनक सुरु भइसकेको छ । यही अवसरमा गायिका मञ्जु पौडेलले मौलिकता र सांस्कृतिक भाव बोकेको नयाँ तीज गीत ‘छैन नि फरिया’ सार्वजनिक गरेकी छन् ।
तीज गीतका नाममा पछिल्लो समय अश्लीलता र विकृति बढिरहेको भन्ने आलोचनाबीच पौडेलले मौलिक लोकभाव र नेपाली चाडपर्वको आत्मालाई उजागर गर्ने प्रयास गरेकी हुन् । गायक तथा गीतकार रेशम चौधरीको शब्द र स्वरमा सजिएको यो गीतमा मञ्जु पौडेलको स्वरले साथ दिएको छ ।
गीतमा प्रयोग भएको लय, शब्द र प्रस्तुतिले नेपाली महिलाहरूको चाड तीजसँग जोडिएको भावनात्मक पक्ष र सांस्कृतिक मौलिकतालाई स्पष्ट रूपमा उतारेको छ । तीज गीतहरू व्यवसायिकता र तडकभडकमा सीमित हुँदै गएका बेला पौडेल र चौधरीको यो प्रयासले नेपाली लोकसंस्कृतिको संरक्षणमा योगदान पुर्याउने विश्वास लिइएको छ ।
गीतको शीर्षक ‘छैन नि फरिया’ महिलाको पहिरन, चाहना र नेपाली ग्रामीण जीवनशैलीसँग गहिरो सम्बन्धित रहेको छ । गायिका पौडेलका अनुसार, गीतले महिलाको संस्कृति, रहनसहन र चाडपर्वमा आउने भावना र अपेक्षालाई गहिरो रूपमा चित्रण गर्न खोजिएको छ ।
गीतको भिडियो मञ्जु पौडेलको आधिकारिक युट्युब च्यानलमार्फत सार्वजनिक गरिएको छ । भिडियोमा परम्परागत पहिरन, नृत्य र भावभंगिमा प्रयोग गरी मौलिकतालाई थप उजागर गरिएको छ । छायांकन, सम्पादन र निर्देशनले पनि गीतको सार्थकता र सन्देशलाई प्रभावकारी बनाएको देखिन्छ ।
मञ्जु पौडेल यसअघि पनि सामाजिक सन्देश, मौलिकता र नेपालीपन बोकेका तीज गीतमार्फत श्रोता–दर्शकमाझ लोकप्रियता कमाउँदै आएकी छन् । पछिल्लो समय तीज गीतहरूमा प्रयोग हुने भाषा, पहिरन र दृश्यहरूलाई लिएर आलोचना भइरहेका बेला ‘छैन नि फरिया’ जस्तो गीतले मौलिकता, मूल्य र मान्यतालाई पुनः अगाडि ल्याउने काम गरेको गायिका पौडेलको भनाइ छ ।
उनले भनिन्, “बजारमुखी तडकभडकभन्दा पर गई संस्कार र संस्कृति जोगाउने पक्षलाई प्राथमिकता दिएका छौँ । गीतको मौलिकता दर्शक–श्रोताले मन पराउनेमा विश्वस्त छु ।”
गीतको पूरा भिडियो :
