गुल्मी । दुई दिनदेखि अवरुद्ध भएको गुल्मीको कालीगण्डकी करिडोर मंगलबार दिउँसोदेखि पुनः सञ्चालनमा आएको छ । आइतबार बिहान कालीगण्डकी गाउँपालिका–६ बर्लवा र वडा नं. १ गरगरे क्षेत्रको सडक खण्डमा ठूलो चट्टानसहितको पहिरो खसेपछि करिडोर पूर्ण रूपमा बन्द भएको थियो।
जिल्ला प्रहरी कार्यालय गुल्मीका प्रमुख प्रहरी नायब उपरीक्षक गंगाबहादुर सारुका अनुसार पहिरोले सडक पुरिएकोले सवारी आवागमन ठप्प भएको थियो। लगातारको प्रयासपछि मंगलबार दिउँसोदेखि सडक सुचारु भएको हो।
सडक सञ्चालनमा आएपछि सवारीसाधनहरू पुनः गन्तव्यतर्फ गुड्न थालेका छन्। पहिरोका कारण दुई दिनसम्म यात्रु र स्थानीयवासीले निकै सास्ती खेप्नुपरेको थियो।
यात्रुहरूको सहजताका लागि स्थानीय सरकार, प्रहरी र सडक डिभिजन कार्यालयको समन्वयमा पहिरो पन्छाउने कार्य तीव्र रूपमा अघि बढाइएको थियो।
यद्यपि लगातारको वर्षासँगै पहिरो खस्ने जोखिम कायमै रहेकाले सतर्कता अपनाउन स्थानीय प्रशासनले आग्रह गरेको छ। वर्षा सुरु भएपछि कालीगण्डकी करिडोर बारम्बार अबरुद्ध हुँदै आएको छ।
