गुल्मी । फेन्सी कपडा व्यवसायी समिति, गुल्मीको आयोजनामा रेसुङ्गा नगरपालिका-८ स्थित चौतारा गौसालामा धार्मिक, सांस्कृतिक र पर्यावरणीय सन्देश बोकेको बर र पिपलको वृक्षारोपण गरिएको छ।
शनिबार सम्पन्न कार्यक्रमको संयोजन समितिका सह–सचिव शिव पाण्डेले गरेका थिए। वृक्षारोपण शिव पाण्डेकी ६६ वर्षीय आमा गीता पाण्डेको कर-कमलबाट गरियो। पूजनीय मानिने बर र पिपलको रोपाइँले धार्मिक आस्था, मातृत्वको सम्मान र वातावरण संरक्षणको गहिरो सन्देश दिएको सहभागीहरूको भनाइ छ।
कार्यक्रममा समितिकी उपाध्यक्ष उमा भट्टराई, सहसचिव शिव पाण्डे, सदस्य दीपक रेग्मी, रेसुङ्गा नगरपालिका अध्यक्ष विष्णु पाण्डे, नगर सचिव केशव मरासिनी, नगर कोषाध्यक्ष गोविन्द पाण्डे, नेपाल स्वयंसेवी रक्तदाता समाज गुल्मीका अध्यक्ष तथा केन्द्रीय सदस्य ध्रुव पाण्डे, व्यवसायी देवराज पाण्डे, विष्णु भट्टराईलगायतको उल्लेखनीय उपस्थिति रहेको थियो।
कार्यक्रमका संयोजक शिव पाण्डेले वृक्षारोपण अभियानलाई “सामाजिक जिम्मेवारीसँगै भावी पुस्ताका लागि सकारात्मक सन्देश दिने पहल” भएको उल्लेख गरे। स्थानीय बासिन्दाहरूले यस किसिमको प्रयासले धार्मिक स्थलको संरक्षण, वातावरणीय चेतना र सामुदायिक एकता प्रवर्द्धन गर्ने विश्वास व्यक्त गरेका छन्।
कार्यक्रमपछि समितिले रेसुङ्गा क्षेत्रलाई हरियाली र स्वच्छ बनाउने अभियानलाई निरन्तरता दिने प्रतिबद्धता जनाएको छ।
