गुल्मी – सदरमुकाम तम्घासस्थित महेन्द्र नमुना माध्यमिक विद्यालयलाई अन्तर्राष्ट्रिय गुणस्तर चिन्ह प्रदान गरिएको छ । मंगलबार अन्तर्राष्ट्रिय गुणस्तर चिन्ह (आईएसओ) काे तर्फबाट विद्यालयलाई यससम्बन्धी प्रमाणपत्र हस्तान्तरण गर्ने प्रक्रियाका लागि लाेगाे वा चिन्ह हस्तान्तरण गरिएको हो ।
कुल ५२ वटा सूचकमध्ये २० प्रतिशत सूचक पार गरिसकेपछि विद्यालयलाई आईएसओ नेपाल प्रतिनिधि सुदिप शर्माले रेसुङ्गा नगरपालिका उपप्रमुख अमृतादेवी कुँवरकाे राेहवरमा विद्यालयका कार्यवाहक व्यवस्थापन समिति अध्यक्ष रामप्रसाद पन्थी र प्रधानाध्यापक कृष्णप्रसाद मरासिनीलाई उक्त अन्तर्राष्ट्रिय गुणस्तर चिन्ह हस्तान्तरण गरिएको हो ।
आफूहरूले एकवर्ष भित्रमा सबै सूचक पूरा गरेर आईएसओ प्रमाणपत्र प्राप्त गर्नका लागि बाटो खुला भएको विद्यालयका प्रधानाध्यापक कृष्णप्रसाद मरासिनीले बताए । उनलेे विद्यालयमा शैक्षिक सुधारसँगै भाैतिक रुपमा पनि सुधार गरेपछि चिन्ह प्राप्त गरेकोले सबै यससम्बन्धी गम्भीर बनेर सबै प्रकारका सूचक पूरा गरेर अन्तरास्ट्रिय गुणस्तर चिन्हकाे प्रमाणपत्र पाउने गरि अगाडि बढ्ने बताएका छन् ।
विद्यालयले अन्तर्राष्ट्रिय गुणस्तर चिन्ह प्रमाणपत्र प्राप्त गर्न निश्चित गुणस्तर सूचकहरू पूरा गर्नुपर्छ । यी सूचकहरू शिक्षा, प्रशासन, विद्यार्थी सेवा, पूर्वाधार र मूल्याङ्कन लगायतका क्षेत्रमा आधारित हुन्छन् ।
विद्यालयले अन्तरास्ट्रिय गुणस्तर चिन्हकाे प्रमाणपत्र प्राप्त गरेपछि यस विद्यालयबाट अध्ययन गरेर जाने विद्यार्थी अन्तरास्ट्रिय बजारमा सबै विद्यार्थीसँग प्रतिस्पर्धा गर्न सक्नेछन् ।
