गुल्मी । गुल्मीको गुल्मीदरबार गाउँपालिका पूर्ण खाेप सुनिश्चित भएको छ । जिल्ला समन्वय समिति गुल्मीका प्रमुख द्राेण बहादुर खत्रीले बुधबार एक औपचारिक कार्यक्रममा घाेषणा गरेसँगै गुल्मीदरबार पूर्ण खाेप सुनिश्चित भएको हो ।
गाउँपालिकाकाे स्वास्थ्य शाखाको आयोजनामा सभाहलमा भएको पूर्ण खाेप सुनिश्चितता घाेषणा कार्यक्रममा शाखा प्रमुख नारायण प्रसाद अर्यालले गाउँपालिकामा खाेपकाे अवस्था सम्बन्धमा जानकारी गराएका थिए । उनलेे स्वास्थ्यका सुचककाे जानकारी दिँदै गुल्मीदरबार दीर्घकालीन समयसम्मकाे लागि पूर्ण खाेप सुनिश्चित हुने दाबी समेत गरे । १६ देखि २३ महिनाका बालबालिकालाई लगाउनुपर्ने सबै खाेप लगाइएकोले गाउँपालिका पूर्ण खाेप सुनिश्चित भएको हो । गाउँपालिकाका सबै वडामा रहेका वडा स्तरीय खाेप समन्वय समितिलाई पालिका स्तरीय खाेप समन्वय समितिकाे तर्फबाट प्रमाणपत्र प्रदान गरिएको छ । साथै खाेप सुनिश्चितता कार्यक्रममा सबै वडाका खाेप कार्यकर्तालाई पनि प्रमाणपत्र प्रदान गरिएको हो ।
गाउँपालिका उपाध्यक्ष तारा थापा ढेंगाले खाेपबाट बालबालिकालाई बञ्चित गराउन नहुने बताइन् । खाेपकाे सुनिश्चिततासँगै गुल्मीदरबार स्वास्थ्य क्षेत्र र अन्य क्षेत्रमा समेत अब्बल बन्दै गएको बताएकी छिन् । उनले स्वास्थ्य क्षेत्रलाई गाउँपालिकाले प्राथमिकतामा राखेर काम गरिरहेकाे बताइन् ।
गाउँपालिकाका अध्यक्ष सराेज कुमार थापाले गुल्मीदरबार गाउँपालिकालाई पूर्ण खाेप सुनिश्चित गर्न स्वास्थ्यकर्मीकै भुमिका बढी रहेको बताए । अध्यक्ष थापाले सबै स्वास्थ्यसँग सम्बन्धित कर्मचारीलाई धन्यवाद दिँदै यसलाई दीर्घकालसम्म कायम राख्नुपर्ने बताए । उनले गुल्मीदरबारकाे समुन्नतिकाे लागि आफूहरू एक भएको बताएका थिए । गुल्मीदरबारलाई पूर्ण खाेप सुनिश्चित गर्नकाे लागि स्वास्थ्यकर्मीले निकै महत्त्वपूर्ण भूमिका निर्वाह गरेका छन् । सबै स्वास्थ्यकर्मी तथा स्वास्थ्य स्वयम्सेविकाले जिल्ला समन्वय समिति प्रमुख द्राेण बहादुर खत्रीबाट प्रतिबद्धता सपथ पनि लिएका थिए ।
जिल्ला समन्वय समिति तथा खाेप समन्वय समिति गुल्मीका प्रमुख द्राेण बहादुर खत्रीले जिल्ला स्तरीय खाेप समन्वय समितिकाे तर्फबाट पालिका स्तरीय खाेप समन्वय समिति गुल्मीदरबार गाउँपालिकालाई प्रमाणपत्र प्रदान गरेका थिए । समन्वय प्रमुख खत्रीले स्वास्थ्य क्षेत्र संवेदनशील क्षेत्र भएकोले सबैभन्दा बढी प्राथमिकता स्वास्थ्यलाई दिनुपर्ने बताए । ‘स्वास्थ्य, शिक्षा र सुशासन महत्त्वपूर्ण सुचकहरू हुन्’, उनले भने “पूर्ण खाेप सुनिश्चित गर्ने गुल्मीदरबारकाे काम प्रशंसनीय छ ।” समन्वय प्रमुख खत्रीले पूर्ण खाेप सुनिश्चित गर्न प्रत्येक वर्ष यसका सबै सुचक सकारात्मक हुनुपर्ने बताए । उनले पूर्ण खाेप सुनिश्चितता गर्नकाे लागि याेगदान दिने सबै स्वास्थ्यकर्मीकाे प्रशंसा गरे ।
पूर्ण खोप सुनिश्चितता घाेषणा कार्यक्रममा सबै स्वास्थ्य संस्थाका प्रमुख तथा प्रतिनिधि, स्वास्थ्य स्वयम्सेविका तथा सराेकारवालाले खाेप सुनिश्चित दीर्घकालसम्म रहनुपर्नेमा जाेड दिएका थिए । उनीहरुले प्रतिबद्धता समेत ब्यक्त गरेका छन् । ‘पूर्ण खाेप-सुरक्षित भविष्य’ भन्ने मूल नाराका साथ पूर्ण खाेप सुनिश्चितता घाेषणा भएको हो ।
