गुल्मी । गुल्मीदरबार गाउँपालिकामा उत्पादित वस्तुको लेबलिङ र प्याकेजिङ सम्बन्धी अन्तरक्रिया कार्यक्रम सम्पन भएको छ । घरेलु तथा साना उद्योग कार्यालय गुल्मीको आयोजना तथा गुल्मीदरबार गाउँपालिकाको समन्वयमा एक दिने ‘उत्पादित वस्तुको लेबलिङ र प्याकेजिङ’ सम्बन्धी अन्तरक्रिया तथा प्रशिक्षण कार्यक्रम सम्पन्न गरिएको हो ।
प्रशिक्षण कार्यक्रममा खाद्य प्रविधि तथा गुण नियन्त्रण कार्यालयका प्राविधिक सहायक मनोज अधिकारी, घरेलु तथा साना उद्योग कार्यालयका जीवन घिमिरेले लेबलिङ र प्याकेजिङ प्रविधिका बारेमा जानकारी गराएका थिए । लेबलिङ र प्याकेजिङको सही प्रयोगले उत्पादनको ब्राण्डिङलाई मजबुत बनाउने, यसको बजारमा पहुँच बढाउने र ग्राहकहरूको विश्वास जित्नेमा ठूलो भूमिका खेल्ने बारेमा जानकारी गराएका थिए ।
कार्यक्रममा कार्यालय प्रमुख राजीव अर्यालले प्रशिक्षणका उद्देश्यबारे जानकारी गराएका थिए । उनले यस्ता कार्यक्रमहरूले स्थानीय उत्पादनको गुणस्तर वृद्धि सहयोग अपेक्षा गरे । कार्यक्रममा गुल्मीदरबार गाउँपालिकाका प्रमुख प्रशासकीय अधिकृत भेषराज घिमिरेले गुणस्तर वस्तुकाे उपभाेग गर्ने अधिकार उपभोक्ताकाे भएकाे हुदाँ उत्पादक तथा बिक्रेताले गुणस्तरीयता कमयम राख्न भन्ने बिषयवस्तुमाजानकारी गराएका थिए । गाउँपालिकामा उत्पादित वस्तुहरूको लेबलिङ र प्याकेजिङमा सुधार ल्याउने उद्देश्यले अन्तरक्रिया गरिएको हो । सहायक प्रमुख जिल्ला अधिकारी हरिप्रसाद गैरेले गुणस्तरीय वस्तुको उत्पादन गर्न समेत जाेड दिए ।
उनलेे यस्ता कार्यक्रम गाउँ टोलसम्म पुर्याउनु पर्ने बताए । उपभोक्ताको सुरक्षा र अधिकार सुनिश्चित गर्न, सही लेबलिङ र प्याकेजिङ अत्यन्तै महत्त्वपूर्ण हुने गैरेले बताए । यस कार्यले उपभोक्तालाई स्वास्थ्य समस्याबाट जोगाउँने उनको भनाइ छ । गुल्मीदरबारको सभाहलमा सम्पन्न कार्यक्रमको सहजीकरण घरेलु तथा साना उद्योग कार्यालयका मिलन भण्डारीले गरेका थिए ।
