गुल्मी । गुल्मी जिल्ला सदरमुकाम तम्घासमा खेलकुदमा प्रतिबन्धित औषधि सेवन विरुद्धको सचेतना कार्यक्रम गरिएको छ । युवा तथा खेलकुद मन्त्रालयको आयोजनामा जिल्लामा पहिलो पटक खेलाकुदमा प्रतिबन्धित औषधि सेवन (एन्टी डोपिङ इन स्र्पोट) विरुद्धको सचेतना कार्यक्रम गरिएको हो । जिल्ला सदरमुकाम तम्घासमा सम्पन्न कार्यक्रममा विभिन खेल क्षेत्रका खेलाडी र विद्यालयका खेल शिक्षकहरुलाई सचेतना कार्यक्रम गरिएको थियो । कार्यक्रममा युवा तथा खेलकुद मन्त्रालयका सचिव रबिलाल पन्थले कार्यक्रम महत्वको बारेमा जानकारी गराउदै खेल क्षेत्रको विकासमा भौतिक विकासले मात्रै खेल क्षेत्र अगाडी नबढने भएकाले प्रतिबन्धित औषधि सेवन विरुद्धको सचेतना कार्यक्रम पनि आबश्यक रहेको बताउनुभयो ।
प्रतिबन्धित औषधि सेवन भएको फोला परेमा खेलाडीको प्रतिष्ठा सदाका लागि गुम्ने जोखिम हुने र कमाएको इज्जत समेत गुम्ने भएकाले मन्त्रालयले खेलाडीहरुलाई सचेतना जगाउने उदेश्यले जिल्ला जिल्लामा सचेतना कार्यक्रम अगाडी सारिएको बताउनुभयो । प्रतिबन्धित औषधि सेवनले खेलाडीको भविश्य मात्रै नभई देशकै भविश्य बिग्रने सचिव पन्थले बताउनुभयो । प्रतिबन्धित औषधि सेवन प्रयोग गरेको पुष्टी भएमा जुनसुकै खेलकुद प्रतियोगिताको प्राप्त पदक गुम्ने र प्रतिष्ठामै आँच आउने भएकाले खेलाडी र प्रशिक्षकले औषधि खरिद र प्रयोगमा निकै सचेत रहनुपर्ने पन्थको भनाइ छ । सेचतना कार्यक्रममा डाक्टर अशिम भण्डारीले कुन कुन औषधिहरु प्रतिबन्धित छन्, झुक्एिर वा थाहा नपाएर कस्ता औषधि सेवन गर्दा खेलाडी डोपिङमा पर्ने गर्दछन् जस्ता विषयमा जानकारी गराउनुभएको थियो ।
उहाँले प्रतिबन्धित विभिन्न औषधिहरुको बारेमा समेत जानकारी गराउनु भएको थियो । नेपालका केही खेलाडीहरु विगतमा प्रतिबन्धित औषधि सेवनका कारण प्राप्त गरेको पदक खोसिएको थियो भने खेलाडी केही समय निलम्बनमा परेको पाइएको थियो । कार्यक्रममा गुल्मी जिल्लाका प्रमुख जिल्ला अधिकारी कृष्णप्रसाद शर्माले प्रतिबन्धित औषधि सेवन स्वास्थ्यमा असर पर्नुका साथै राष्ट्रलाई समेत असर पर्ने बताउनुभयो । कानुनद्धारा प्रतिबन्धित औषधि प्रयोग नगर्न खेलाडीलाई आग्रह गरे । रेसुङ्गा नगरपालिकाका नगरप्रमुख खिलध्वज पन्थीले सबैले खेल क्षेत्रमा प्रतिवन्धित औषधिको प्रयोगले खेलाडीको खेलसँगै व्यक्तिगत र सामाजिक जीवनमा पनि नकरात्मक असर पर्ने भएकाले त्यस्ता कार्यबाट सचेत रहन आग्रह गर्नुभयो ।
सचेतना कार्यक्रममा सहभागि खेलाडी गोबिन्द हिताङ किकेट प्रतिबन्धित औषधि सेवन स्वास्थ्यमा असर पर्ने बारेमा पहिलो पटक जानकारी लिएको बताउनुभयो । उहाँले यस्तो प्रतिबन्धित औषधि सेवन नगर्न सबै खेलाडीलाई आग्रह गर्नुभयो । युवा तथा खेलकुद मन्त्रालयले देशका ४ वटा जिल्लामा प्रतिबन्धित औषधि सेवन विरुद्धको सचेतना कार्यक्रम गरेको छ । यो कार्यक्रमलाई देशभर सचेतना गर्ने तयारी मन्त्रालयको रहेको छ । जिल्लाका खेलाडीलाई प्रतिबन्धित औषधि सेवन विरुद्धको सचेतना कार्यक्रमले महत्त्वपूर्ण जानकारी गराएको जिल्ला खेलकुद विकास समिति अध्यक्ष गिरिप्रसाद महाकिमले बताउनुभयो । उहाँले यसरी जिल्लामै पहिलोपटक यस्तो खालको कार्यक्रम गरेकोमा मन्त्रालयलाई धन्यवाद दिनुभयो ।
