गुल्मी । गुल्मीकाे इस्मा गाउँपालिकाका सुकुम्बासीलाई लालपूर्जा वितरण गर्नको लागि निस्सा प्रदान गरिएको छ । राष्ट्रिय भूमि आयोग जिल्ला समिति गुल्मीले आज गाउँपालिकामा पुगेर भूमिहीन र सुकुम्बासीलाई निस्सा दिएकाे हाे ।
भूमिहीन दलित १३ , भूमिहीन सुकुम्वासी २२ र अव्यवस्थित बसोबासी १८९ गरि दुई सय २२ जनालाई निस्सा प्रदान गरिएको छ । लालपूर्जा वितरण गर्नका लागि निस्सा दिन थालिएको हो । निस्सा प्राप्त गरे पछि भूमिहीन दलित, भूमिहीन सुकुम्बासी र अव्यवस्थित बसोबासीहरु अब चाँडै लालपुर्जा पाउने आशामा बसेका छन् ।
भूमि आयोग जिल्ला समिति गुल्मीका अध्यक्ष राम मल्ल ठकुरीले गाउँपालिकाका नागरिकलाई छिटो लालपूर्जा वितरणको लागि आफूहरु लागि परेको बताए । ‘यो जग्गा प्राप्ती होइन । जग्गा नाप्ने बेलामा यही निस्सा देखाउनुपर्छ,’ ठकुरीले भने, ‘निस्सा पाएपछि तपाईंहरुको एउटा चरण पूरा भयो ।’
अब थप अनुगमन गरेर जग्गा वितरणका लागि प्रक्रिया अघि बढ्छ ।’विभिन्न कागजपत्र र तीनपुस्ते विवरण भर्न छुट भई निस्सा नपाएका लाभग्राहीहरुलाई पनि प्रक्रिया पूरा गरेर निस्सा वितरण गरिने उनको भनाइ छ । निस्सा पाएका लाभग्राहीहरुको अब थप अनुगमन गरेर जग्गा वितरणका लागि नाँपजाँच गर्ने कार्य अगाडि बढेपछि छिट्टै लालपूर्जा वितरण हुने अध्यक्ष ठकुरीले बताए ।
इस्मा गाउँपालिकाका अध्यक्ष भगत सिंह खड्काले लामो समयसम्म जग्गा नपाएका सुकुम्वासी नागरिकले निस्सा प्राप्त गरेसँगै अब लालपुर्जा पाउने बाटो खुलेको बताए । लालपुर्जा प्राप्तीका लागि आवश्यक कार्य गर्न सहजीकरण गर्ने उनले बताएका छन् ।
त्यस्तै कार्यक्रममा उपाध्यक्ष अधिवक्ता पार्वती कुवँरले भुमि आयोगले छिट्टै लालपुर्जा दिन आग्रह गरिन उनले गाउँपालिका जुनसुकै सहयोगका लागि तयार रहेको बताएकि छन् ।
निस्सा पाएकाहरुमध्ये सुकुम्वासीले १० दशमलव ६५ आना र अव्यवस्थितले २ रोपनीसम्म जग्गा पाउने राष्ट्रिय भूमि आयोग जिल्ला समिति गुल्मीका विज्ञ सदस्य तिलाचन पाण्डेले बताए ।
जग्गा प्राप्तीका लागि सुकुम्वासीले बसिरहेको ठाउँमा पहिलो प्रथामिकता हुनेछन् । त्यो वाहेक वडा, पालिकाभित्र, जोडिएको पालिका वा नेपालका कुनैपनि ठाउँमा तोकिए त्यो ठाउँमा जग्गा पाउने पाण्डेको भनाइ छ । त्यस्तै अव्यवस्थितले बसिरहेको ठाउँमा मात्रै पाउने छन् । त्यो बाहेक अनेत्र उनिहरुको लागि जग्गा वितरण हुने छैन् ।
