गुल्मी । गुल्मी जिल्लाको इस्मा गाउँपालिका वडानम्बर- ४ हुलमा एक जना महिला मृत फेला परेकी छन् । हुल स्थित उपल्लो गहते बस्ने ५० वर्षकी मीना दर्लामी मृत फेला परेको जिल्ला प्रहरी कार्यालय गुल्मीका प्रहरी नायब उपरीक्षक ( डिएसपी ) शंकर पोखरेलले बताए । घरमा खाना खाएरसँगै सुतेका श्रीमान शिव दर्लामीले राति पानी खान्छु भनेर माग्दा नभेटेपछि खोज्ने क्रममा घरको बलेनीमा मृत अवस्थामा देखेको प्रहरीले जनाएको छ । मृत्युको कुनै कारण नखुलेको डिएसपी पोखरेलले बताए । घटनाबारे थप अनुसन्धानको लागि जिल्ला प्रहरी कार्यालय गुल्मीबाट प्रहरी निरीक्षक भुपेन्द्र थापाको कमान्डमा प्रहरी परिचालन भएको छ । मृतक महिलाको शव घटना स्थलमै रहेको प्रहरीले जनाएको छ ।
