गुल्मी । मुसिकोट नगरपालिकाकी नगर उपप्रमुख गंगा श्रेष्ठले आफूलाई नगरपालिकाको बजेट निर्माण प्रक्रियाबाट एकोहोरो रूपमा बाहिर राखिएको गुनासो गर्दै नगरप्रमुखमाथि गम्भीर आरोप लगाएकी छन्।
नगरपालिकाको अठारौँ नगरसभा अधिवेशन अन्तर्गत आर्थिक वर्ष २०८२/०८३ को बजेट पारित गर्ने तेस्रो बैठकमा बोल्दै उपप्रमुख श्रेष्ठले संविधानले प्रत्याभूत गरेको आफ्नो अधिकार खोसिएको दाबी गरिन्।
उनको भनाइमा, नगर प्रमुखले केही सीमित आफ्ना निकटका व्यक्तिहरूको उपस्थितिमा ढोका लगाएर बजेट तयार गरेका छन्। “बजेटमा तलमाथि भएर आएको छ। सभा सदस्यहरुले लाग्ला, उपप्रमुख बजेट तर्जुमा समितिको संयोजक भएकाले उपप्रमुखले नै यो बजेट निर्माणमा सक्रिय भूमिका खेलिन् होला। तर म स्पष्ट भन्न चाहन्छु, १० गतेदेखि अहिलेसम्म नगरप्रमुख र उहाँको टोलिले ढोका लगाएर बजेट बनाउनु भएको छ,” उपप्रमुख श्रेष्ठले भनिन्, “म यसरी तयार पारिएको बजेटप्रति पूर्ण असहमति जनाउँछु।”
उनले नगरपालिकाको कार्यसम्पादन, बजेटको प्राथमिकता निर्धारण र योजनाहरूको छनोटमा आफूलाई जानबुझेर बेवास्ता गरिएको भन्दै चिन्ता व्यक्त गरिन्। “म कुनै पार्टीको विपक्षमा होइन। म त केवल आफनो अधिकार खोजिरहेकी छु,” श्रेष्ठले भनिन्, “मैले समावेश गराएका केही महत्वपूर्ण योजनाहरू बजेटमा घटाएर वा हटाएर ल्याइएको छ, जुन सरासर अन्याय हो।”
उपप्रमुख श्रेष्ठले बजेट निर्माण जस्तो संवेदनशील कार्यमा समावेशी प्रक्रिया अपनाइनु पर्नेमा जोड दिँदै नगरप्रमुखले व्यक्तिवादी सोचले नगर सञ्चालन गर्न खोजेको आरोप लगाइन्।
उनको भनाइ अनुसार बजेटमा देखिएको असमानता र ढिलासुस्तीले योजनाको कार्यान्वयनमा समस्या उत्पन्न हुन सक्छ, जसको प्रत्यक्ष असर जनतामाथि पर्नेछ। “यस्तो अपारदर्शी र मनपरी तरिकाले बजेट बनाउने अभ्यासले स्थानीय सरकारको गरिमा र भरोसामा नै आँच आउँछ,” उपप्रमुख श्रेष्ठले चेतावनी दिइन्।
