गुल्मी । गुल्मीको मालिका गाउँपालिका वडा नम्बर ८ मा रहेको थानपती आधारभूत विद्यालय शैक्षिक सुधारमा लागेको छ । विद्यालय व्यवस्थापन समितिको अगुवाइमा शिक्षकलाई तलब र अन्य शैक्षिक खर्चका लागि अभियान नै संचालन गरि आर्थिक संकलन गरेर अक्षयकोष स्थापना गरेको हो ।
बुधबार विद्यालयमा पत्रकार सम्मेलन गरेर विद्यालय व्यवस्थापन समितिका अध्यक्ष डिबी खड्काले ब्याजबाट खर्चको जोहो गर्नेगरि रकम संकलन गरि ‘थानपती कल्याणकारी कोष’ स्थापना गरिएको बताए । उनले अभियानबाट १० लाख ३४ हजार ७ सय रुपेयाँ सहयोग उठेको बताए । ‘ग्रामीण विद्यालयमा कुनै आर्थिक स्रोत छैन्,’ उनले भने, ‘उठेको रकम अक्षयकोष हुनेगरि ब्याजबाट खर्च चलाउनेछौँ ।’ अभियानमा १ सय २७ जनाले सहयोग गरेका छन् । जसमा १८ जना विद्यालयसँग प्रत्यक्ष नजोडिएपनि असल अभियान भएकोले जोडिएर आर्थिक सहयोग गरेका छन् । जसमा दाङ र काभ्रेपलान्चोकबाट समेत सहयोग आएको छ ।
विद्यालयले महायज्ञ, मेला महोत्सव र धनधान्यञ्चल गर्दा आधा खर्च हुने, बोलरकम मात्रै हुने र ब्यापर जस्तो देखिने हुँदा अभियान चलाएर सिधा सहयोग उठाएको पत्रकार सम्मेलनमा खड्काले बताए । दीर्घकालीन शिक्षण सुधार अक्षयकोषमा न्यूनतम १ हजार ५ सय देखि अधिकतम स्थानीय सिर्जना खड्काले श्रीमान्को सम्झनामा ५५ हजार ५ सय ५५ रुपैयाँ सहयोग गरेकी छिन् ।
१५ हजार माथि सहयोग गर्नेको ताम्रापत्र र ५० हजार माथि सहयोग गर्नेको दुई पुस्ते ताम्रापत्रमा उल्लेख गरिनेछ । अक्षयकोषको रकम गाउँमै लगानी गरिनेछ । जसअनुसार ७ सदस्यीय परिचालन समिति गठन गरिएको छ । वित्तीय पारदर्शिताका लागि पत्रकार सम्मेलन गरेर जानकारी गराइएको हो ।
विद्यालय पछिल्लो समय शैक्षिक सुधारमा अग्रसर छ । विद्यालयका प्रधानाध्यापक गोविन्द बुढामगरले वार्षिक १३ सार्वजनिक विदामा पनि अध्ययन अध्यापन भएको बताए । उनका अनुसार, थानपती आधारभूत विद्यालय उत्कृष्ट विद्यालय व्यवस्थापन समितिबाट गुल्मीमै सम्मानित भएको थियो । विद्यालयमा १२ जना शिक्षक छन् । प्राथमिक तहमा ५ दरबन्दी १ स्थानीय पालिकाको काजमा गरि ६ जना र कक्षा ६-८ मा एक संघीय र १ पालिका अनुदानमा २ शिक्षक छन् । विद्यालयमा विद्यार्थी संख्या १ सय २२ जना छन् । विद्यालय व्यवस्थापन समितिमा डिबी खड्का आएपछि शैक्षिक सुधारका कार्यक्रम अगाडि बढेका छन् । खानेपाली, शौचालय, खेलमैदान, विदामा अध्ययन, विभिन्न विधामा विद्यार्थी पुरस्कार र अभिभावक सम्मान लगायतका कार्यक्रम विद्यालयमा थपिएका छन् ।
विद्यालयमा चासो राखेर विद्यार्थीप्रति उत्तरदायी बनेकोमा स्थानीय अभिभावक प्रेमाकुमारी खड्कालाई नगदसहित सम्मान पत्रले सम्मान गरिएको छ । यस्ता कदमले अभिभावकलाई उत्तरदायी बनाउन भूमिका खेल्ने विद्यालयको अपेक्षा छ ।
