गुल्मी । गुल्मीको अमरपुरमा हिमा गौतम स्मृति कोषद्वारा निःशुल्क स्वास्थ्य शिविर संचालन हुनेभएको छ । हिमा स्मृति कोषले बुधबार गुल्मीको सदरमुकाम तम्घासमा पत्रकार सम्मेलन गर्दै जिल्लाको इस्मा गाउँपालिका वडा नम्बर ६ अमरपुरमा यही चैत २८ र २९ गते निःशुल्क स्वास्थ्य शिविर संचालन हुने जानकारी गराएको हो ।
कोषका मुख्य संस्थापक संयुक्त राष्ट्र संघका पूर्व उपमहासचिव कुलचन्द्र गौतमका अनुसार, दुर्गम तथा स्वास्थ्य सेवाको सहज पहुँच नपुगेका स्थानीय बासिन्दाहरूलाई लक्षित गरी विशेषज्ञ चिकित्सकहरूको टोलीले निःशुल्क सेवा प्रदान गर्नेछ । स्वास्थ्य शिविरमा काठमाडौं, बुटवल र तानसेनका प्रतिष्ठित वरिष्ठ चिकित्सकहरू सहभागी हुनेछन् । शिविरमा हाडजोर्नी, नशा रोग, स्त्रीरोग, बालरोग, छाला रोग, जनरल फिजिसियन सेवा, रक्त परीक्षण तथा औषधि वितरण जस्ता सेवा निःशुल्क प्रदान गरिनेछ ।
हिमा गौतम स्मृति कोषका मुख्य संस्थापक तथा संयुक्त राष्ट्रसंघका पूर्व उपमहासचिव कुलचन्द्र गौतमले ग्रामीण क्षेत्रका विपन्न तथा असहाय नागरिकहरूको जीवनस्तर सुधार्न कोषले निरन्तर प्रयास गरिरहेको बताए । ‘स्वास्थ्य, शिक्षा र सामाजिक क्षेत्रको विकास आवश्यक छ,’ गौतमले भने, “हामीले यस क्षेत्रमा निरन्तर योगदान गरिरहेका छौँ, जसबाट सबै नागरिक लाभान्वित भइरहेका छन् ।” विगत तीन दशकदेखि शिक्षा, स्वास्थ्य तथा सामाजिक सेवामा क्रियाशील हिमा गौतम स्मृति कोषले यसअघि पनि अमरपुर र आसपासका विद्यालयहरूमा निःशुल्क पाठ्यसामग्री वितरण, छात्रवृत्ति कार्यक्रम तथा विद्यालय स्तरोन्नतिको पहल गर्दै आएको छ। स्वास्थ्य क्षेत्रमा पनि कोषले स्थानीय स्वास्थ्य चौकीलाई आवश्यक उपकरण तथा औषधि उपलब्ध गराउँदै आएको छ ।
कोषका अनुसार, २०६९ सालमा अमरपुर स्वास्थ्य चौकीलाई सरकारले स्तरोन्नति गरे पनि अझै अत्याधुनिक उपकरण तथा विशेषज्ञ सेवाको अभाव छ । यसै कारण, कोषले समयसमयमा निःशुल्क स्वास्थ्य शिविर आयोजना गर्दै आएको छ । स्थानीय बासिन्दाले यसअघि कोषद्वारा संचालित स्वास्थ्य शिविरहरूबाट ठूलो राहत पाएका छन् ।
शिविरमा वरिष्ठ चिकित्सकहरू डा. प्रकाश पौडेल, डा. ऋषिकुमार काफ्ले, डा. समीरचन्द्र गौतम, डा. रुपा झा, डा. यज्ञ खड्का, डा. लोकबहादु टण्डन, डा. प्रतिज्ञा गौतम र तीन जना मेडिकल डाक्टर र तीन जना मेडिकल अधिकृतसहित बुटवल र तानसेनका प्रतिष्ठित अस्पतालका चिकित्सकहरूले सेवा प्रदान गर्ने छन् । स्थानीयलाई सहज रूपमा स्वास्थ्य उपचार उपलब्ध गराउने उद्देश्यसहित आयोजना गरिएको यो शिविरमा सहभागी भई निःशुल्क सेवा लिन आयोजक संस्थाका सदस्य सुरेशचन्द्र गौतमले अनुरोध गरे ।
स्वर्गीय आमा हिमा गौतमको सम्झनामा उहाँका ज्येष्ठ छोरा कुलचन्द्र गौतम र अन्य छोराहरू सुरेशचन्द्र गौतम, सुशीलचन्द्र गौतम, दिनेश गौतम साथै छोरीहरु रमा भुसाल र सावित्रा गौतम संस्थापक भई स्थापना भएको हो । यस कोषको स्थापना आमाको मृत्यु पछि २०५३ सालमै स्थापना भएको थियो । यही कोषकै अगुवाइमा अमरपुर प्राथमिक विद्यालयलाई शिक्षाको नीति नियमअनुसार आर्थिक सहयोग गरी स्वर्गीय आमा हिमा गौतमका श्रीमान् तथा कोषका मुख्य संस्थापक कुलचन्द्र गौतमका बुबा ओम प्रसाद गौतमको नामबाट अमरपुर ओम प्रसाद गौतम माध्यमिक विद्यालय नामाकरण गरी विद्यालयको भौतिक संरचनामा समेत काम गरिरहेको छ । यस कोषले अमरपुरसहित आसपासमा स्वास्थ्य र शिक्षाका क्षेत्रमा ब्यापाक रुपमा काम गर्दै आएको छ ।
हिमा स्मृति कोषमा अध्यक्ष नारायण पराजुलीले अमरपुर स्वास्थ्य चौकीमा हुने उक्त शिविरमा इस्मा, मालिका, धुर्काेट र मदानेका सबै नागरिकलाई सेवा लिन आउन अनुरोध छ । उनले कोषले स्वास्थ्य, शिक्षा र समाजिक क्षेत्रमा अतुलनीय काम गरिरहेको बताए । पत्रकार सम्मेलनको सहजीकरण हिरा एसीले गरेका थिए ।
हिमा स्मृति काेषकाे विस्तृत :
पत्रकार सम्मेलन कार्यक्रमसँग सम्बन्धित तस्बिरहरू :
