गुल्मी । राष्ट्रिय अनुसन्धानका मुख्य अनुसन्धान निर्देशक हुतराज थापाले जिल्ला कार्यालय गुल्मीको नवनिर्मित भवन उद्धाटन गरेका छन् । सदरमुकाम तम्घासस्थित लाकुरीमञ्ज नजिकै बनेको राष्ट्रिय अनुसन्धान जिल्ला कार्यालय गुल्मीको कार्यालय भवन बिहिवार निर्देशक थापाले उद्धाटन गरेका हुन् ।
कार्यालय भवनको निर्माण जोग माँ डि.एन.डी. जेभीले गरेको थियो । निर्माण सम्पन्न गर्नुपर्ने समयमै भवन निर्माण कार्य सकेको निर्माण व्यवसायी भोजप्रसाद श्रेष्ठले बताए । भवन कार्यालयकै बजेट अन्तर्गतबाट बनेको हो । जसको प्राविधिक सहयोग सघन सहरी भवन निर्माण आयोजना कार्यालय रुपन्देहीले गरेको इन्जिनियर घनश्याम यादवले बताए ।
२०८० भदौमा एक वर्षमा निर्माण सम्पन्न गर्नेगरि निर्माण कम्पनी र कार्यालय बीच सम्झौता भएको राष्ट्रिय अनुसन्धान जिल्ला कार्यालय गुल्मीका प्रमुख अनुसन्धान अधिकृत विनयकुमार चतुर्वेदीले बताए । सुरुवाती केही समयमा केही प्रक्रिया पूरा गर्न समय लागेको बताउँदै सुरु भएको एक वर्ष वा तोकिएकै समयमा भवन निर्माण गरि निर्माण कम्पनीले आफूहरूलाई हस्तान्तरण गरेको चतुर्वेदीले बताए । कार्यालय भवन भ्याटसहित २ करोड ३ लाख रुपैयाँमा निर्माण भएको चतुर्वेदीले जानकारी दिए । कार्यालय भवन तीन तलामा १२ कोठा छन् । जसको तल्लो तला कार्यालय, बीच तला कार्यालय प्रमुख निवास र माथिल्लो तला अतिथि निवास रहेको छ ।
कार्यालय भवनको उद्धाटन गर्दै राष्ट्रिय अनुसन्धानका मुख्य अनुसन्धान निर्देशक हुतराज थापाले कार्यालय भवन निर्माणमा सहयोग गर्नुहुने सबैलाई धन्यवाद व्यक्त गरे । ‘समयमै चिटिक्क भवन निर्माण भएको छ,’ उनले भने, ‘सबैको सहयोगले सम्भव भयो, योगदान दिनुहुने सबैको प्रशंसा गर्दछु ।’
राष्ट्रिय अनुसन्धान जिल्ला कार्यालय गुल्मीले जिल्ला प्रशासन कार्यालय, रेसुङ्गा नगरपालिका, सघन सहरी भवन निर्माण आयोजना कार्यालय रुपन्देही र निर्माण कम्पनी जोग माँ डि.एन.डी. जेभीलाई सम्मानपत्रले सम्मानित गरिएको थियो ।
