गुल्मी । गुल्मी जिल्ला प्रशानस कार्यालयलाई मानबहादुर एण्ड मायादेवी फाउण्डेसनद्धारा फर्निचर सामाग्री सहयोग भएको छ । जिल्ला प्रशासन कार्यालयमा सेवा लिने सेवाग्रहीको सहजताको लागि मानबहादुर एण्ड मायादेवी फाउण्डेसन तम्घास गुल्मीले १२ वटा बेञ्च सहयोग गरेको छ ।
फाउण्डेसनको तर्फबाट मानबहादुर श्रेष्ठले निमित्त प्रमुख जिल्ला अधिकारी हरिप्रसाद गैरेलाई उक्त फर्निचर सामाग्री प्रदान गरेका हुन् । पछिल्ला दिनहरूमा जिल्ला प्रशासन कार्यालय गुल्मीमा राष्ट्रिय परिचयपत्र र राहदानी बनाउनेको भिड अत्याधिक बढेको छ । भिडका कारणले ज्येष्ठ नागरिकहरु चिसो भुइमा बसेर सेवा लिनु पर्ने अवस्था थियो । त्यसको अत्यका लागि फाउण्डेसनद्धारा फर्निचर सामाग्री सहयोग गरेको फाउण्डेसनका अध्यक्ष नगेन्द्रमान श्रेष्ठले बताए ।
काठबाट तयार भएका बेञ्चमा एउटामा ८ जनासम्म बस्न मिल्ने गरि तयार गरिएको छ । ज्येष्ठ नागरिकहरुले पाइरहेको कष्टपूर्ण अवस्था देखेपछि फाउण्डेसनका संरक्षक मानबहादुर श्रेष्ठले बताए ।
प्रशासन कार्यालयको राष्ट्रिय परिचयपत्र बनाउने ठाउँमा पालो कुर्ने स्थलमा बस्ने बेञ्च नहुँदा समस्या रहेको थियो । राष्ट्रिय परिचयपत्र र राहदानी लगायत प्रशासनका सेवा लिन जाने जेष्ठ नागरिकहरु चिसो भुइमा बसेर पालो कुर्नुपर्ने अवस्था थियो ।
जिल्ला प्रशासन कार्यालय गुल्मीका सहायक प्रमुख जिल्ला अधिकारी हरिप्रसाद गैरेले सेवाग्रहीको सहजताको लागि फाउण्डेसनलाई गरिएको आग्रह स्वरुप १२ वटा बेञ्च सहयोग भएकोमा धन्यवाद दिए । उनले पछिल्लो केहि दिन यता राष्ट्रिय परिचयपत्र, राहदानी लगायत प्रशासनका सबै सेवा लिनेको संख्या अत्यधिक रहेकाले सेवाग्रहीलाई पालो कुर्ने क्रममा चिसो भुइमा बसेर पालो कुर्नुपर्ने बाध्यता रहेको बताए ।
फर्निचर सामाग्री सहयोगले सेवाग्रहीलाई सहज हुने गैरेले बताए । मानबहादुर एण्ड मायादेवी फाउण्डेसनद्धारा गुल्मी जिल्लामा विभिन्न ठाउँमा विभिन्न समयमा सहयोग प्रदान गर्दै आएको छ ।
फाउण्डेसनद्धारा गुल्मी अस्पतालमा ३ वर्षसम्म निःशुल्क स्वास्थ्य शिबिर अयोगजना गरेको फाउण्डेसनका सहयोगी जनक पन्थले बताए । त्यस्तै गुल्मी अस्पतालमा २ जना ल्याब टेक्नीसीयनलाई २ वर्षसम्म तलब रकम भुक्तानी गरेर सेवा दिने काम गरेको पन्थको भनाइ छ ।
जिल्लाका दजाकोट, ताल्तुङ्ग लगायत ठाउँमा आगोलागी पीडित परिवारलाई रहत सामाग्री प्रदान गरेको थियो । फाउण्डेसनद्धारा कोरोना महामारी बाढी पहिरोमा खाद्यन्न सामाग्री सहयोग पनि हुँदै आएको छ ।
सूर्यथुम क्याम्पसलाई ६ थान कम्प्युटर सहयोग गरेको फाउण्डेसनका अध्यक्ष श्रेष्ठले बताए । गुल्मी तम्घास निवासी समाजसेवी मानबहादुर श्रेष्ठका छोराहरुले आफना बुवा आमाको नाममा फाउण्डेसन स्थापना गरेर जिल्लामा समाजिक उत्तरयी स्वरुपका कार्य गर्दै आएका छन् ।
पछिल्लो समय जिल्ला प्रशासन कार्यालय गुल्मीमा सामान्य तया ४० जना देखि ६० जनासम्मको राष्ट्रिय परिचयपत्रका लागि आवेदन लिने गरेको जिल्ला प्रशासन कार्यालय गुल्मीमा पछिल्लो केहि दिन यता दोब्बरले संख्या बृद्धि भएको छ । राष्ट्रिय परिचयपत्र प्राप्तीका लागि आवेदनका लागि ज्येष्ठ नागरिकहरु लाइनमा बस्ने गरेका छन् ।
एकै पटक सेवाग्रही राष्ट्रिय परिचयपत्र बनाउन प्रशासन कार्यालय पुग्दा सेवाग्रही र सेवाप्रवाहमा समेत समस्या हुने गरेको छ । अहिले प्रशासन कार्यालयमा ३ वटा स्टेशनबाट राष्ट्रिय परिचयपत्र बनाउने कार्य गरिएको छ ।
जसमा सरदर ७० जनासम्मको क्षमता रहेको छ । तर अहिले दोब्बरले संख्या बृद्धि हुँदा सेवा ग्रहीलाई पनि समस्या हुने गरेको छ । गुल्मी जिल्ला प्रशासन कार्यालयबाट पछिल्लो एक सातामा ४१६ जनाले राष्ट्रिय परिचयपत्र दिन विवरण दर्ता गराएका छन् ।
