गुल्मी । गुल्मीको चन्द्रकोट गाउँपालिकाको आयोजनामा तेस्रो अध्यक्ष कप अन्तर्गत अन्तर पालिका खुल्ला वडा स्तरीय पुरुष भलिबल प्रतियोगिता संचालन भएको छ । बिहीबारदेखि शान्तिपुरमा दुई जिल्लाका पाँच पालिकाका १६ टिमले प्रतिस्पर्धा गर्दैछन् ।
प्रतियोगितामा आयोजक चन्द्रकोट गाउँपालिकाका १०, मुसिकोट नगरपालिकाबाट २, कालीगण्डकी गाउँपालिकाबाट १, बाग्लुङको वडिगाड गाउँपालिकाका १ र बाग्लुङकै बरेङ गाउँपालिकाका २ गरि जम्मा १६ टिम सहभागी छन् ।
प्रतियोगितामा प्रथम, द्वितीय र तृतीय हुनेलाई क्रमशः ७० हजार, ५० हजार र ३० हजार रुपैया नगदसहित ट्रफी, मेडल र प्रमाणपत्र प्रदान गरिने गाउँपालिकाका प्रमुख प्रशासकीय अधिकृत बुद्धप्रकाश पौडेलले बताए । उनका अनुसार विभिन्न विधामा उत्कृष्ट खेलाडी पुरस्कार प्रदान गरिनेछ । तेस्रो अध्यक्ष कप भलिबल प्रतियोगितामा समग्र साढे ५ लाख रुपैयाँ बजेटमा संचालन हुने गाउँपालिकाका प्रमुख प्रशासकीय अधिकृत पौडेलले बताए ।
वडिगाड गाउँपालिका अध्यक्ष गण्डकी थापाले यस्ता खेलकुद प्रतियोगिताले खेलकुद विकास, स्वच्छ प्रतिस्पर्धा र मित्रता कायम रहने विश्वास गरिन् ।
जिल्ला समन्वय समिति गुल्मीका प्रमुख द्रोण खत्रीले भलिबल प्रतियोगितामा चन्द्रकोटसहित आसपासको क्षेत्रको बढी लगाव रहेको बताए । ‘मानव विकासका सुचकहरु विस्तारै सुधार भएका छन्,’ उनले भने, ‘यस्ता प्रतियोगिताले खेलकुद क्षेत्रलाई माथि उठाउँछ ।’
चन्द्रकोट गाउँपालिकाका अध्यक्ष युवराज केसीले खेलकुद क्षेत्रको विकासका लागि अध्यक्ष कप भलिबल प्रतियोगिता आयोजना गरिएको बताए । उनले यस्ता खेलकुदबाट लुकेको प्रतिभा बाहिर आउने र माथिल्लो तहमा स्थान पाउने हुदा प्रतियोगिता महत्वपूर्ण रहेको बताए । अघिल्लो वर्षहरूमा आफ्नो पालिकाबाट मात्रै प्रतिस्पर्धा गराउने अध्यक्ष कपलाई तेस्रो अध्यक्ष कपमा यस वर्ष फराकिलो बनाउँदै खुल्ला आयोजना गरिएको हो ।
