पाल्पा । तानसेन नगरपालिका अन्तर्गतको लिपिन्देबी प्राथमिक विद्यालयमा पाल्पा जेसीजले ४० जना विद्यार्थीहरूलाई झोला तथा शैक्षिक सामग्री वितरण गरेको छ । बुधबार विद्यालय परिसरमा आयोजित विशेष कार्यक्रममा पाल्पा जेसीजले सामाजिक उत्तरदायित्वअन्तर्गत सो सामग्री वितरण गरेको हो ।
कार्यक्रमका प्रमुख अतिथि तानसेन नगरपालिकाका नगरप्रमुख सन्तोष लाल श्रेष्ठले पाल्पा जेसीजले समाजप्रति देखाएको उत्तरदायित्व र योगदानको खुलेर प्रशंसा गर्नुभयो । उहाँले जेसीजले ‘भविष्य बोक्ने झोला’ वितरण गरेर विद्यार्थीलाई सिकाइतर्फ आकर्षित गर्न थप ऊर्जा दिएको बताउनुभयो । बालबालिकाको शैक्षिक यात्रालाई सहज बनाउन यस्ता सशक्त सहयोगले ठूलो योगदान दिने बताउदै यस्ता सामाजिक कार्यहरू प्रेरणादायी मात्र होइन, व्यवहारिक रूपमा प्रभावशाली हुने बताउनुभयो । उहाँले सोही अवसरमा आफ्नी स्वर्गीय आमा चिनादेवी श्रेष्ठको स्मृतिमा ५० हजार रुपैयाँको अक्षयकोष विद्यालयमा स्थापना गर्ने घोषणा पनि गर्नुभयो । अक्षयकोषबाट प्राप्त ब्याज आम्दानी अस्थायी शिक्षकको तलबमा टेवा पुर्याउने प्रयोजनका साथ नगरप्रमुख श्रेष्ठले अक्षयकोष स्थापना गरेको बताउनुभयो । उहाँले जेसीज संस्थाले सधैं विधि र अनुशासनको मार्गदर्शनमा समाजसेवामुखी कार्यक्रम गर्दै आएको भन्दै यस्ता सहकार्यलाई नगरपालिकाले सधैं स्वागत गर्ने बताउनुभयो ।
कार्यक्रमका विशिष्ट अतिथि तानसेन वडा नं। ११ का अध्यक्ष तथा नगर प्रवक्ता यादवसिंह कार्कीले जेसीजले विभिन्न सामाजिक क्षेत्रमा पुर्याउँदै आएको योगदानको सराहना गर्दै विद्यालयमा झोला वितरण कार्यक्रमलाई सशक्त सामाजिक कदमको रूपमा व्याख्या गर्नुभयो । उहाले शिक्षा क्षेत्रमा राज्यले ठूलो लगानी गरिरहेको बताउनुभयो । सरकारी विद्यालयमा एक जना विद्यार्थीको लागि वार्षिकरूपमा औसत ५६ हजार २१६ रुपैयाँ खर्च भइरहेको बताउदै लगानी प्रभावकारी बनाउन विद्यालयहरूको गुणस्तर अभिवृद्धि र व्यवस्थापन सुधार अपरिहार्य रहेको बताउनुभयो । वडा अध्यक्ष कार्कीले वर्तमानमा राज्यले थेग्न नसक्ने भारलाई मध्यनजर गर्दै केही विद्यालयहरू मर्ज गर्ने नीतिअनुसार काम गरिरहेको समेत जानकारी दिनुभयो । उहाँले यस्ता कार्यक्रमले अभिभावक, शिक्षक र विद्यार्थीहरूलाई शिक्षाको महत्त्व बुझ्न थप प्रेरणा दिने विश्वास व्यक्त गर्नुभयो । संस्थागत र गैरसंस्थागत साझेदारीमार्फत शिक्षा क्षेत्रलाई सुदृढ बनाउन सकिने र यस किसिमको कार्य त्यसको उत्कृष्ट उदाहरण रहेको बताउनुभयो ।
कार्यक्रममा विद्यालयका प्रधानाध्यापक केशरी बस्नेत ‘गोदार’ले पाल्पा जेसीजलाई धन्यवाद दिँदै विद्यालयमा यस्ता सहयोगले विद्यार्थीको सिकाइ प्रक्रियामा सकारात्मक प्रभाव पार्ने उल्लेख गर्नुभयो । सस्थाले विधालयमा आएर झोला तथा शैक्षिक सामाग्री प्रदान गरेको आभार व्यक्त गर्दै निरन्तर सहयोगको अपेक्षा गर्नुभयो । कार्यक्रममा पाल्पा जेसीजका अध्यक्ष विवेक काजी शाक्यले “भविष्य बोक्ने झोला” अभियानले विद्यार्थीहरूलाई जिम्मेवारी र शिक्षाप्रतिको प्रतिबद्धतामा मद्दत पुर्याउने आशा व्यक्त गर्नुभयो । उहाले आगामी दिनमा विद्यालयसँग सहकार्य गर्दै अझ बढी सहयोगका कार्यक्रमहरू सञ्चालन गरिने बताउनुभयो ।
कार्यक्रममा पाल्पा जेसीजका निवर्तमान अध्यक्ष अर्जुन कार्की, वडा नं १ का अध्यक्ष एवम् जेसीजका पूर्व अध्यक्ष सुनिल बस्याल, विद्यालय व्यवस्थापन समितिका अध्यक्ष नरबहादुर शारू, समाजसेवी लक्ष्मण घिमिरे, वडा सदस्यहरू शवु खाती, अमर राना, लालबहादुर खाती, पाल्पा जेसीजका पदाधिकारी, शिक्षक, अभिभावक र विद्यार्थीहरूको उल्लेखनीय उपस्थिति रहेको थियो । कार्यक्रम पाल्पा जेसीज अध्यक्ष विवेक काजी शाक्यको अध्यक्षता, महासचिव गणेश पन्थीको सञ्चालन र कानुनी सल्लाहकार महेश खनालको स्वागत मन्तव्यका साथ सम्पन्न भएको थियो।
