गुल्मी । गुल्मीको धुर्कोट गाउँपालिका–५ वस्तु अमराईमा आगलागीबाट एक महिलाको ज्यान गएको छ। जिल्ला प्रहरी कार्यालय गुल्मीका अनुसार आइतबार बिहान करिब ३ बजेतिर भएको आगलागीमा परी ३० वर्षीया जुना विकको मृत्यु भएको हो।
मृतक जुना विक मानसिक सन्तुलन गुमाएकी महिला रहेको र उनी ७० वर्षीया आमा मनिदेवी विकसँगै बस्दै आएकी थिइन्। स्थानीय वडाध्यक्ष केशवराज भण्डारीका अनुसार घरमा मनिदेवीका नातिहरू पनि बस्दथे, तर उनीहरू सकुशल रहेको बताइएको छ। ती नातिहरू मनिदेवीका छोरातर्फका हुन्।
जस्ताले छाएको कच्ची एकतले घरमा अचानक आगलागी हुँदा घर पूर्णरूपमा जलेर नष्ट भएको छ। आगलागीको कारण खुल्न सकेको छैन।
घटनापछि इलाका प्रहरी कार्यालय पुर्कोटदहबाट प्रहरी निरीक्षक रेवन्त सेनको नेतृत्वमा टोली खटिएको जिल्ला प्रहरी कार्यालयका सूचना अधिकारी डिएसपी गंगाबहादुर सारुले जानकारी दिए।
आगलागीबाट घरमा रहेका सामग्री जलेर नष्ट हुँदा करिब तीन लाख रुपैयाँभन्दा बढीको क्षति भएको अनुमान गरिएको छ।
मृतकको शव पोस्टमार्टमका लागि गुल्मी अस्पताल ल्याइँदैछ।
