गुल्मी । ललितकला क्षेत्रमा लामो समयदेखि समर्पित हरीराम अधिकारी नेपाल सरकारद्वारा प्रादेशिक प्रतिभा पुरस्कार–२०८१ बाट सम्मानित भएका छन्। गुल्मीको इस्मा गाउँपालिका–३, दर्लामचौर निवासी अधिकारीलाई लुम्बिनी प्रदेशतर्फको ललितकला विधामा उल्लेखनीय योगदान पुर्याएको भन्दै संस्कृति, पर्यटन तथा नागरिक उड्डयन मन्त्रालयले सम्मान गरेको हो।
काठमाडौँको जमलस्थित नेपाल सांस्कृतिक संस्थानमा आयोजित सम्मान तथा पुरस्कार वितरण समारोहमा अधिकारीलाई सम्मानपत्रसहित नगद पुरस्कार प्रदान गरिएको हो। समारोह सह-सदस्य सचिव सुरेश सरस श्रेष्ठको अध्यक्षतामा सम्पन्न भएको थियो भने कार्यक्रममा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री छविलाल विश्वकर्मा, मन्त्रालयका सचिवहरूसहित विभिन्न मन्त्रीहरू, प्रतिष्ठानका कुलपति, प्राज्ञ र स्रष्टाहरूको उपस्थिति रहेको थियो।
सम्मानपत्रमा उल्लेख गरिएको छ, “विगत लामो समयदेखि ललितकलाको क्षेत्रमा समर्पित रही पुर्याउनु भएको योगदानको कदरस्वरूप नेपाल सरकारद्वारा स्थापित राष्ट्रिय तथा प्रादेशिक प्रतिभा पुरस्कार अन्तर्गत लुम्बिनी प्रदेशको प्रादेशिक प्रतिभा पुरस्कार–२०८१ द्वारा यहाँलाई सम्मानित गरिएको छ।”
अधिकारीले नेपाली ललितकलाको पहिचान र समृद्धिमा पुर्याएको योगदानप्रति कदर गर्दै मन्त्रालयले यो सम्मान प्रदान गरेको हो। अधिकारीको सृजनशीलता, समर्पण र कलाप्रतिको लगावले लुम्बिनी प्रदेशको ललितकलाको पहिचान निर्माणमा उल्लेखनीय भूमिका खेलेको आयोजक संस्थाले जनाएको छ।
