गुल्मी । गुल्मीको इस्मा गाउँपालिका–५ दरबार टोलकी ३० वर्षीया विष्णु परियार जन्मजातै अपाङ्गता अवस्थामा रहँदै आएकी थिइन्। जीवनभर राज्यका आधारभूत सेवा–सुविधाबाट वञ्चित हुँदै आएकी उनी बुधबार पहिलोपटक नागरिकताको प्रमाणपत्र र ‘क’ वर्गको अपाङ्ग परिचयपत्र हातमा पार्दा भावविह्वल भइन्।
इस्मा गाउँपालिकाको टोली विष्णुको घरमै पुगेर नागरिकता र परिचयपत्र हस्तान्तरण गरेपछि उनी खुशीका आँसुमा ढुब्बीइन्। आँसु पीडाका थिएनन्, त्यो खुसी र अपनत्वका थिए। “अब त म पनि नागरिक भएँ,” विष्णुले भनेको त्यो वाक्यले कार्यक्रममा सहभागी सबैको गला अबरुद्ध बनायो।
कार्यक्रममा गाउँपालिका उपाध्यक्ष तथा अधिवक्ता पार्वती कुँवरले यस्तो मानवीय सेवाबाट समुदायमा सकारात्मक सन्देश गएको बताउँदै भनिन्, “सेवा प्रवाहको आत्मा भनेकै यस्तै संवेदनशीलता हो। हामीले आगामी दिनमा पनि (क) वर्गका अपाङ्गता भएका व्यक्तिहरूलाई घरमै पुगेर नागरिकता र परिचयपत्र बितरण गर्दै जानेछौं।”
उनका अनुसार फरक क्षमता भएका नागरिकहरूका लागि गाउँपालिकाले निरन्तर कार्यक्रमहरू सञ्चालन गर्दै आएको छ।
गाउँपालिका अध्यक्ष भगत सिंह खड्काले भने, “विष्णुका आँखाबाट बगेका खुसीका आँसु हेर्दा हामी स्वयं पनि भावुक भयौं। राज्यका सेवा–सुविधाबाट कोही पनि वञ्चित नहोस् भन्ने हाम्रो दायित्व हो। नागरिकता र अपाङ्ग परिचयपत्र प्रदान गरेर हामीले समावेशी शासन र संवेदनशील सेवाको उदाहरण दिन खोजेका हौं।”
अब विष्णु परियारले श्रावण महिनादेखि नै सामाजिक सुरक्षा भत्ता पाउनेछिन्।
