हेलसिन्की, फिनल्यान्ड । फिनल्यान्डको राजधानी हेलसिन्कीमा पहिलोपटक भव्य सांस्कृतिक कार्यक्रम ‘नेपाल डे फिनल्यान्ड २०२५’ आयोजना हुँदैछ। फिन्निश नेपाली समाज हेलसिन्की र NRNA फिनल्यान्डको संयुक्त पहलमा यहि अगस्ट ९ तारिख, Ala-Malmin Puisto मा हुने कार्यक्रममा नेपाली कला, संस्कृति, स्वाद र पहिचानलाई विशेष रूपमा प्रस्तुत गरिनेछ।
कार्यक्रम दिउँसो १ बजे सुरु भई साँझ ७ बजेसम्म सञ्चालन हुनेछ। खुला र निःशुल्क यो उत्सवले फिनल्यान्डमा रहेका नेपालीहरूलाई एकजुट गर्दै मौलिक संस्कृतिप्रतिको गर्व अभिव्यक्त गर्नेछ।
पञ्चेबाजा, बालबालिकाका नृत्य, तीज गीत, नेपाली ब्यान्डका लाइभ प्रस्तुति, राष्ट्रिय तथा स्थानीय कलाकारहरूको सांगीतिक कार्यक्रम यस अवसरमा प्रस्तुत गरिनेछ। साथै, मःम, सेलरोटी, ढिँडो जस्ता नेपाली परिकारका स्टलहरू पनि विशेष आकर्षण हुनेछन्।
NRNA फिनल्यान्डका उपाध्यक्ष तारा प्रसाद सापकोटाले भने, “यो केवल कार्यक्रम होइन, फिनल्यान्डमा नेपाली इतिहासको नयाँ अध्याय हो। नेपाली संस्कृति र एकतालाई विश्वमञ्चमा उचाल्ने अभियान हो।”
‘नेपाल डे २०२५’ लाई फिनल्यान्डमा नेपाली सांस्कृतिक पहिचानको जीवन्त प्रदर्शनको रूपमा हेरिएको छ, जसले अन्य समुदायहरूलाई समेत नेपाली समाजप्रति आकर्षित गर्ने विश्वास गरिएको छ।
